Փետրվարի 21-ը հայոց պետական տոնացույցում իր արժանի տեղն ունի, այն ՅՈՒՆԵՍԿՕ-ի կողմից ճանաչվել է «Մայրենիի օր»: Այս կապակցությամբ Նոր Նորքում գործող Երևանի հ.197 հիմնական դպրոցում կազմակերպվել էր ուշագրավ միջոցառում՝ 4ա դասարանի աշակերտների մասնակցությամբ: Մշակութային ժառանգության պահպանման ու զարգացման համար լեզուն ամենաուժեղ գործիքն է: Հայոց լեզվի արժևորմանը նվիրված միջոցառմանը երեխաները բանաստեղծություններ, երգեր և ասույթներ հնչեցրեցին մաքուր հայերենով` հայոց լեզվի մասին: Ցերեկույթն ուղեկցվեց նաև թատերական ու պարային կատարումներով և թեմատիկ տեսաշարով: Միջոցառմանը մասնակցում էին Նոր Նորք վարչական շրջանի ղեկավարի աշխատակազմի կրթության, մշակույթի և սպորտի բաժնի ներկայացուցիչներ, ուսուցիչներ և ծնողներ: -Հայ ինքնության պահպանման համար չափազանց կարևոր է մայրենիի իմացությունը, պահպանումն ու տարածումը, -կարևորեց դպրոցի տնօրեն Ալմաստ Ավետիսյանը՝ արժևորելով միջոցառման դերն ու նշանակությունը նոր սերնդի հայեցի դաստիարակության գործում: Բարձր տպավորություններով կիսվեցին նաև միջոցառմանը ներկա հյուրերը՝ նշելով, որ մայրենի լեզուն ազգային ինքնության պահպանման առհավատչյան է, համայն հայ ժողովրդի միասնականության և համախմբվածության գրավականը: Նկարները՝ այստեղ |