Շատ եմ ափսոսում այդ հրաժարականի համար ու կարծում եմ, որ Կարեն Անդրեասյանը բավականին լավ էր իրականացնում իր ինստիտուտի գործունեությունը, և մենք նկատելի առաջխաղացում ունեինք այդ ոլորտում: Կարծում եմ, որ ինքը ճնշմանը չդիմացավ, ընկրկեց: Ցավում եմ դրա համար, մարդու իրավունքների պաշտպանը չպիտի ընկրկեր: Էս իշխանությունը կարծում է, թե մարդու իրավունքների պաշտպանն իր իրավունքների պաշտպանն է և բոլոր այն դեպքերում, երբ իշխանության իրավունքների պաշտպանությունը ստորադասվում է ՀՀ քաղաքացու իրավունքների պաշտպանությունից, անվայել ձևով հարձակվում է մարդու իրավունքների պաշտպանի ինստիտուտի և անձամբ պաշտպանի վրա: Կարծում եմ, որ սա լուրջ հետընթաց է Հայաստանի հանրապետության ժողովրդավարական կառավարման ոլորտում: Շատ խիստ վրդովված եմ, նեղված:

Ափսոսում եմ, որ հրաժարական է տվել: Ես շատ լավ գիտեմ, թե ինչպես է դա տեղի ունեցել, ինչպես է զարգացել: Ես առաջինը չեմ, որ դա տեսել եմ, դուք բոլորդ ականատես եք եղել: Ես ափսոսում եմ, որ Կարեն Անդրեասյանը հրաժարական է տվել, պետք է ավելի դիմացկուն լինել այդ պաշտոնում: Զգացվում էր, բերում են նրան, որ անձը հրաժարական տա: Ինձ ժամանակին ասում էին՝ ձեր տեղը որ տղամարդ լինի, մի քանի անգամ ինֆարկտ կստանա: Չե՞ք հիշում իմ հանդեպ ինչեր էին անում, ես չեմ հիշում, որ երկրորդ կամ երրորդ մարդու իրավունքների պաշտպանների հանդեպ այդքան կոշտ ու կոպիտ վերաբերմունք լիներ, ինչպես դա եղել է իմ ժամանակ: Պարզապես պետք է գործը տաներ Կարեն Անդրեասյանը մինչև իր ժամանակի ավարտը: Ես հասկանում եմ, որ դա դժվար է, բայց սա պետական բարձր պաշտոն է, և ես հրաժարական չէի տա:

Համոզված եմ, որ ՀՀԿ-ում այս հարցի հետ կապված պաշտոնապես քննարկումներ չեն եղել, սակայն դա չի նշանակում, որ ՀՀԿ ղեկավարությունը, անհատները, որոնք այդքան հզոր դիրքեր ունեն և նրանց ասածը բազմաթիվ քննարկումներից շատ ավելի մեծ կշիռ ունի, դա չքննարկեին: Բնականաբար, Հայաստանում որևէ մեկը հենց այնպես հրաժարական չի ներկայացնում: Նման կարևոր պաշտոնից հրաժարական տալու պատճառը բնական է պետք է կապված լինի հարաբերությունների հետ:

Ինձ համար ակնհայտ է, որ ինչ որ պատճառ եղել է, որ Կարեն Անդրեասյանը դուրս է եկել: Չգիտեմ՝ ՀՀԿ ո՞ր շրջանակներց, թե ի՞նչ պաշտոնյայի ցանկությունն է եղել, բայց սա ևս մեկ անգամ ցույց է տալիս, որ Հայաստանում անգամ մարդու իրավունքների պաշտպանի իրավունքները պաշտպանված չեն, էլ ուր մնաց քաղաքացիների և մյուսների: Սա լուրջ խնդիր է ու համակարգային, և այս բոլոր խնդիրները կապված են մի կետի հետ. երկրում համակարգային փոփոխություններ պետք է արվեն, այլ տարբերակ մենք չենք տեսնում

ՀՀ-ը թերևս այն երկրներից է, որտեղ անգամ Մարդու իրավունքների պաշտպանն է անպաշտպան: Ցավում եմ, որ հրաժարական ներկայացրեց, մյուս կողմից էլ կարծում եմ, որ ճիշտ որոշում էր, մնալ մի համակարգում, լինել մի իշխանությունում, որը վաղուց ապացուցել է, որ իրեն բանիմաց և խելացի մասնագետներ պետք չեն, անհրաժեշտ չէր...

Ինձ համար անսպասելի էր այդ հրաժարականը, որովհետև ես դրա համար հիմքեր չէի տեսնում: Բնականաբար կարող են լինել անհամաձայնություններ՝ մարդու իրավունքների զեկույցի հետ կապված: Անհատ ՀՀԿ-ական պատգամավորներ իրենց անձնական կարծիքն են հայտնել՝ ելույթներ ունենալով, և ոչ թե խմբակցության կարծիքն են հայտնել:
ՄԻՊ-ի պոստն այն պոստն է, որտեղ ներկայացված անձը պետք է շատ ազատ լինի, պետք է լինի ժողովրդավարական անձնավորություն, ոչ մի գաղտնիք չպետք է պահի, և եթե կան նման խնդիրներ, ինքը պետք է արձագանքի: Ես կարող եմ ասել, որ նման երևույթ չի եղել: Դա պարզապես նախնական հրաժարական է, ինձ թվում է նա դեռ մտածելու ժամանակ ունի, և երկրորդ անգամ եթե կպնդի իր հրաժարականը, արդեն դա կդառնա քննարկման առարկա:
Որևէ խոսակցություն չի եղել, քննարկումներ չեն եղել ո՛չ ՀՀԿ-ում, ո՛չ իշխանության ներսում, որևէ համաձայնություն չի եղել, դա Կարեն Անդրեասյանի անձնական որոշումն է եղել: