Վարդան Մինասյանի վերանշանակման հավանականության մասին ասեմ, որ այս կյանքում, առհասարակ, ոչինչ բացառել պետք չէ: Նշեմ նաև, միաժամանակ, որ հավաքականի գլխավոր մարզչին նշանակելը բացառապես Հայաստանի ֆուտբոլի ֆեդերացիայի և նախագահի գործառույթն է: Եթե նպատակահարմար կգտնեն Վարդան Մինասյանի թեկնածությունը, ապա դա կնշանակի, որ նրան վստահում են: Ինչ վերաբերում է բացասական և դրական կողմերին, ապա պետք է ասեմ, որ դրական կողմը միայն այն է, թերևս, որ Մինասյանը հայ է, մեր մտածելակերպին ավելի մոտ, մեր ֆուտբոլիստներին ավելի քաջատեղյակ: Ցավոք, միանման մտածելակերպը մարզչական աշխատանքի հիմքում դնելն ընդունված է միայն Հայաստանում, թերևս: Խոսքը հավաքականի գլխավոր մարզիչների մասին է: Բազմաթիվ են դեպքերը, երբ որևէ երկրի հավաքական գլխավորել է այլազգի մասնագետ, ով փայլուն հաջողությունների է հասել տվյալ հավաքականի հետ: Այնպես որ, չեմ կարծում, թե բացառապես հայ մասնագետ հրավիրելը միանշանակ օգտակար կլինի: Ֆուտբոլիստները պրոֆեսիոնալներ են և պարտավոր են աշխատել և խաղալ ցանկացած մարզչի գլխավորությամբ: Մեր փորձը ցույց է տվել, որ մշտապես Հայաստանի հավաքականը գլխավորել են կամ բացառապես անհայտ, կամ միջին կարգի օտարազգի մասնագետներ: Իմ խորին համոզմամբ՝ եթե ցանկանում ենք հաղթանակներ ունենալ, հաջողություններ ունենալ, ապա պետք է գումարները չխնայել՝ անվանի և փորձառու մասնագետ հրավիրելու համար: Մինասյանի ժամանակ հաջողություններ ունեցել ենք, բայց անձամբ ես, դա կապում եմ ավելի շատ ֆուտբոլիստների կողմից Մինասյանին հարգելու հետ: Անկեղծ պետք է լինեմ և ասեմ, որ ինչպես Բեռնար Շալանդի, այնպես էլ Մինասյանի ժամանակ, մեր հավաքականի խաղերի ընթացքում ինքս որևէ մարտավարական փոփոխություն չեմ նկատել: Մարզչի ամենահրաշալի կարողություններից մեկն էլ, հաշվի առնելով մյուս կարևոր հատկանիշները, հենց խաղի ընթացքում՝ ելնելով հանդիպման ընթացքից և մրցակցի խաղից, մարտավարական անակնկալ փոփոխություններն ու քայլերն են: Սրանով է նաև մարզիչն ուժեղ: Մեծ առումով, բացասական կողմ չեմ տեսնում, եթե նշանակվի Վարդան Մինասյանը: Այլ հարց է, թե որքա՞ն ժամանակով կնշանակվի: Վերջերս լուրեր էին շրջանառվում, իբր հրավիրվելու է Վալերի Կարպինը, ով մեր ընտրանին կգլխավորի մինչև ընտրական ընթացիկ փուլի ավարտը: Նման մոտեցումը սխալ կլինի: Մեզ հիմա անհրաժեշտ է մարզիչ, ով կօգտագործի ընտրական փուլի մնացած խաղերը՝ միաժամանակ թիմին և իրեն նախապատրաստելով ընտրական հաջորդ փուլի համար: Բայց կրկնեմ, հավաքականի գլխավոր մարզչին նշանակելու գործառույթը Հայաստանի ֆուտբոլի ֆեդերացիայի նախագահինն է: